本影片「難忘的故鄉」，曾獲高雄市教育局舉辦的96年度「五分鐘映像高雄競賽」系列活動，國中組第一名。以相聲方式，娓娓道出家鄉的現況以及將來的演變→遷村，很有黑色幽默的味道。

演出學生：204趙國宏  204龔政緯。

指導老師：李宜靜。陳盈岑。

劇本：

緯（唱）：心事若無講出來，有誰人會知？……
宏：阿肥啊，勿擱唱啦！擱唱落去，我的心臟病著要發作啊！
緯：阿公啊，你看隔壁阿勇仔歇熱要出國去佚陶，阿咱兜攏無動無靜，逐工佇厝足無聊呢？
宏：你是講卜出國去爽喔…… ！阿肥阿，你啊！胡蠅戴龍圓殼-蓋頭蓋面啦！卜出國，奚愛開足濟錢呢！你甘知影？你阿爸甲阿母攏在做臨時工阿，麥哪有可能？
緯：唉！（唱）別人的生命是箍金擱包銀，阮的生命哪遮無值錢…
宏：啊！阿肥啊！我想到了，阿公知影有一個所在，遐是阿公的故鄉。離阮兜擱無外遠，嘛有真嫷的海口風景，甲足濟歷史悠久的廟宇古蹟；你甘有想卜去踅踅？
緯：海邊仔哦！好啊好啊！無魚蝦嘛好。阿公，你啥米時陣卜帶我去？我尚愛食青跳跳的沙西米共烘魷魚。
宏：我著知哦！阿肥啊！你還未講出喙，我就看到你的嚨喉前。好！即碼阿公就先放一片影帶乎你看，奚是我卡早的故鄉。你若臆會着，我就帶你來去。
（古蹟廟宇、高字塔之影片播放、旁白）
旁白1—飛鳳寺
緯：喔！這間廟真水！阿公，這間是什麼廟？
宏：這間叫做飛鳳寺，即碼供奉的是廣澤尊王，因為祂真有靈赦，時常保護佇海頂掠魚拼湧的紅毛港人，是大部分紅毛港人心靈寄託的所在。
旁白2—保安堂(牌樓)
緯：阿公，這間廟小間擱醜醜，有什麼通介紹呢？
宏：囝阿人有耳沒嘴，毋通黑白講，這是一間足特殊的廟。
    這間廟拜的是一隻日本軍艦。佇60外年前，紅毛港的漁民在海頂卡到一副人的骨頭，就將伊供奉在保安堂。後來伊顯聖乎漁民，才知道祂是日本太平洋艦隊第38艦的艦長，紅毛港人甚至組團送靈轉去日本証實呢！
旁白2—保安堂(軍艦)
緯：喔！這隻軍艦金光閃閃，確是真特殊！
旁白2—保安堂(供品)
緯：我爸！真正攏拜日本酒呢！酷喔！
（海口風情、高字塔之影片播放、旁白）
旁白3—海口風情1.2.3
宏：阿肥啊！你看遮的風景有水無?你臆看遮是啥米所在？
緯：（搔搔腦袋）嗯！確實有讚！我想看覓?甘是旗津?遐嘛偎海邊，有足濟漁船、古蹟甲海產，說到海產，我就卜流喙瀾。阿公，我臆的對毋對啊？
宏：勿對啦！你甘那想卜食，你看，你已經肥甲衫褲將卜撐破呢。
緯：阿公，我遮叫做「頭大臉四方，肚大奇才王」。

宏：我看你是「頭大人空空，喙闊爻膨風」。阿公講的不是遐啦！我說的是咱高雄市最南爿的「紅毛港」啦！
緯：即個地名真心適。阿公，佇你卜帶我去進前，甘會駛先紹介一下？
宏：好啊！紅毛港這個地名的由來，是因為卡早即個漁港捌乎荷蘭人佔領過，荷蘭人的頭毛攏紅紅，所以，人將遮號做紅毛港。遮原底是一個足富裕的漁港仔，大部分的人攏底討海，嘛因為討海起樓仔厝、賺大錢。聽老輩講，銀票要用布袋底。
緯：（偷笑）太憨啊！聽你安呢講，紅毛港不就攏是好業人？
宏：無剉，歸叢好好。
緯：阿阮兜現在那攏在做工？
宏：唉！其中有蓋多因素啦，就勿擱講啊！
（鳳林國中影片、旁白）
旁白4—鳳林國中校門口
宏：阿肥啊！你看，這間是啥米學校？
緯：不過是一間國中爾爾。
宏：這是卜斡入去紅毛港兮時，一定會先看到遮的「最高學府」－鳳林國中啦。
緯：哈哈哈！有夠好笑！小小一間國中，就叫作「最高學府」哦！
宏：這是卡早你阿爸讀的學校！校園真正水，現在你先看覓，看有讚無？
旁白5－中庭、操場、烤肉場、游泳池、電腦教室
緯：哇塞！在遮讀冊有夠爽呢！啊鳳林國中頭前，有啥米好吃覓無？
宏：阿肥啊！你呀！開喙合喙攏是食。我誠是啞口乎蜂叮－毋話講哦！好啦，趁今哪日是禮拜日，我現在就帶你來去紅毛港踅踅呢！
旁白6—紅毛港拆遷現況（1.2.3.4.5）
緯：阿公，遮那會安怎?那親像遇到空襲呢！
宏：因為現此時，紅毛港卜改作「貨櫃碼頭」，所有的紅毛港人都要搬厝，就連學校、寺廟甲神明也攏作伙請走，想到遮，就那親像唐山過台灣，我的心肝著結歸丸。
緯：按呢以後就無紅毛港這個所在了？
宏：是啦！毋那無紅毛港，連鳳林國中嘛徙位，原底足嫷的校園變作一條貨櫃車在走的大路啊！
（新校舍影片）
旁白7—新校舍工程
宏：但是鳳林國中的新校舍嘛已經開始動工，聽講市政府撥足多錢來建設，將來一定是一間外觀水、設備新、尚現代化的學校，要栽培愈多咱地方優秀的人才。
緯：哦！變化有夠大呢！
（旁白8－祖孫看海影片）
宏：是阿，伊永遠是阿公尚難忘的故鄉。而且，我相信打斷手骨顛倒勇！將來紅毛港一定會脫胎換骨，乎咱紅毛港重新發展起來，乎咱紅毛港人更加光榮！
緯、宏：到時陣，歡迎大家相偕來遮做生意，來遮佚陶！
（今仔日的報導到這為止，感謝大家的收看！）
（字幕：謝謝收看！）